მაია ცქიტიშვილი ჰონგ კონგის ბიზნეს დელეგაციის წევრებს შეხვდა

მაია ცქიტიშვილი ჰონგ კონგის ბიზნეს დელეგაციის წევრებს შეხვდა

საქართველოს ვიცე-პრემიერი, რეგიონული განვითარებისა და ინფრასტრუქტურის მინისტრი მაია ცქიტიშვილი თბილისში ოფიციალურ ვიზიტად მყოფ ჩინეთის რესპუბლიკის სპეციალური ადმინისტრაციული რეგიონის ჰონგ კონგის დელეგაციას შეხვდა. დელეგაციაში შედიან ფინანსების, ინფრასტრუქტურის, დაზღვევის, ტექნოლოგიების, ვაჭრობის და სხვა სფეროს წარმომადგენლები. დელეგაციას ჰონგ კონგის სპეციალური ადმინისტრაციული მთავრობის კომერციისა და ეკონომიკური განვითარების მინისტრი ედვარდ იაო თენგ ვამი ხელმძღვანელობს. 

ვიზიტის მიზანია დელეგაციის წევრები და კერძო სექტორის წარმომადგენლები გაეცნონ იმ ბიზნეს და საინვესტიციო შესაძლებლობებს, რასაც საქართველო სთავაზობს „ერთი გზა-ერთი სარტყელის“ ინიციატივის ფარგლებში.

ვიცე-პრემიერმა  სტუმრებს სამინისტროს საქმიანობა და პოტენციური ინვესტორებისათვის საინტერესო და მნიშვნელოვანი ინფრასტრუქტურული პროექტები გააცნო. ვიცე-პრემიერმა ხაზი გაუსვა ჩვენი ქვეყნის სტრატეგიულად მნიშვნელოვან გეოპოლიტიკურ მდებარეობას და მისი ათვისების და გამოყენების შესაძლებლობებს.  

მხარეებმა საქართველოსა და ჰონგ კონგს შორის სავაჭრო და ეკონომიკური ურთიერთობების ზრდის შესახებ ისაუბრეს. 

მაია ცქიტიშვილმა განსაკუთრებული აქცენტი გააკეთა იმ შესაძლებლობებზე, რომელსაც ქართული და ჰონგ კონგის კომპანიები მიიღებენ ორ ქვეყანას შორის თავისუფალი ვაჭრობის რეჟიმის ამოქმედებით. 

ვიცე-პრემიერმა ისაუბრა ქვეყნის სატრანსპორტო-ლოგისტიკური ინფრასტრუქტურის მშენებლობის პროექტის განსახორციელებლად საქართველოს მთავრობის ძალისხმევაზე.